दमक, २८ मंसिर
इष्टर्न वेभरेज प्रालि झापाले बेला पानीको उल्लेखनीय सफलतापछि बेला डेरीको व्यवसायलाई पनि विस्तार गर्दै दमकमा नयाँ बिक्री केन्द्र स्थापना गरेको छ । बिक्री केन्द्र स्थापना भएसँगै दमक तथा आसपासका उपभोक्ताले बेला डेरीका उत्पादनहरू सहज रूपमा पाउने भएका छन् ।
बेला डेरीका बजार प्रबन्धक मिलन शर्मा मैनालीका अनुसार हाल कोशी प्रदेशका विभिन्न बजारमा डेरी उत्पादनको बिक्री वितरण भइरहेको छ । बजार विस्तार योजनाअन्तर्गत बिर्तामोड, इटहरी, धरान जस्ता मुख्य शहरहरूमा पनि बिक्री केन्द्र खोल्ने तयारी गरिएको उनले जानकारी दिए ।
डेरी उद्योगको मुख्य उद्देश्य किसानले उत्पादन गरेको ताजा दूधलाई आधुनिक मेसिनमार्फत प्रशोधन गरी गुणस्तरीय दुग्धजन्य परिकार उत्पादन गरेर बजारमा पु¥याउनु रहेको छ । ‘गोठदेखि ओठसम्म’ भन्ने अवधारणालाई व्यवहारमा उतार्दै उद्योगले किसानसँग प्रत्यक्ष रूपमा दूध खरिद गर्दै आएको छ । हाल दैनिक करिब सात हजार लिटर दूध किसानबाट संकलन गरिँदै आएको छ ।
बजारबाट सकारात्मक प्रतिक्रिया प्राप्त भएपछि व्यवसाय विस्तारको सिलसिलामा बिक्री केन्द्र खोलिएको मैनालीले बताए । बेला डेरीले दूध, दही, मोही, घिउ, पनिर, आइसक्रिम, लस्सी लगायतका दुग्धजन्य सामग्री उत्पादन तथा बिक्री गर्दै आएको छ । बेला डेरीको मुख्य कारखाना झापा जिल्लाको गौरादह नगरपालिका वडा नं. ७ ग्वालडुब्बामा रहेको छ ।
बेला पानी उद्योग तथा बेला डेरी उद्योगका सञ्चालक रामचन्द्र प्रसाईका अनुसार पाँच वर्षअघि सुरु गरिएको बेला पानी हाल कोशी प्रदेशमै राम्रो बजार लिन सफल भएको छ । दुई वर्षअघिदेखि सञ्चालन गरिएको डेरीका उत्पादनहरू विराटनगर, इटहरी, धरान, इनरुवा र बिर्तामोडसम्म पु¥याइँदै आएको छ ।
पानी र डेरी उद्योग सञ्चालनसँगै झण्डै दुई सय जनाले प्रत्यक्ष रोजगारी पाएको उनले बताए । उद्योगले किसान, उपभोक्ता र स्थानीय बजारलाई जोड्दै अर्थतन्त्रमा योगदान पु¥याउँदै आएको छ ।