विराटनगर, ५ मंसिर
मोरङ जिल्लामा ४४ हजार नयाँ मतदाता थपिएका छन् । नेपाल सरकारले गत असोज १० देखि आजसम्म तोकेको समयावधिमा ४३ हजार ८ सय ३५ जनाले नयाँ मतदाता थपिएका हुन् ।
योसँगै मोरङ जिल्लामा मतदाताको संख्या ७ लाख ८५ हजार ५ सय ९० पुगेको छ । मोरङमा यस अघि ७ लाख ४१ हजार ७ सय ५५ मतदाता संख्या रहेका थिए ।
कोशी प्रदेशका निर्वाचन अधिकारी चौलाराम दंगालले २०८२ असोज १० गतेदेखि मंसिर ५ गतेसम्मको समय अवधिमा मोरङमा ४३ हजार ८ सय ३५ जना नयाँ मतदाताले आवेदन दिएको बताए । १६ हजार ४ सय ८ जना मतदाताले कोशी प्रदेशको निर्वाचन कार्यालय विराटनगरबाट आवेदन दिएका छन् । राष्ट्रिय परिचय पत्रको आधारमा २७ हजार ४ सय २७ जना मतदाताले घरबाटै आवेदन दिएको निर्वाचन अधिकारी दंगालले बताए ।
