उर्लाबारी, १३ मंसिर
नेपाल रेडक्रस सोसाइटी उपशाखा उर्लाबारीको आयोजनामा सञ्चालित प्राथमिक उपचार सम्बन्धि तालिम आज सम्पन्न भएको छ । समुदायमा आकस्मिक घटनाको व्यवस्थापन क्षमता अभिवृद्धि गर्ने उद्देश्यले उर्लाबारी नगरपालिकाको सभाहलमा आयोजित तालिममा उर्लाबारीका १४ विद्यालयबाट शिक्षक नायक र विद्यार्थी गरी ७० जनाको सहभागिता रहेको थियो ।
आज समापन कार्यक्रममा नेपाल रेडक्रस सोसाइटी मोरङका सभापति सुकदेवप्रसाद मण्डल, पूर्वसभापति सुबोधकुमार सिंह, उर्लाबारी उपशाखा पूर्वसभापति मदनबाबु प्रसाईलगायतले तालिममा सिकेको सीपलाई व्यवहारिक जीवनमा लागु गर्नुपर्ने बताउनुभयो । उपशाखा सभापति भानुभक्त शर्मा पराजुलीको अध्यक्षतामा भएको कार्यक्रममा उपशाखा उपसचिव तथा कार्यक्रम संयोजक सचिन शाक्यले विद्यालयस्तरमा प्राथमिक उपचार सम्बन्धी सीप विकास हुनु आवश्यक रहेको बताउनुभयो । उहाँले विद्यालयमा हुने साना–ठूला दुर्घटना, चोटपटक, स्वास्थ्य आपतकालीन अवस्थालाई तालिमप्राप्त शिक्षक र विद्यार्थीले तत्काल व्यवस्थापन गर्न सक्ने भएकाले यस्तो तालिम अत्यन्तै उपयोगी भएको उल्लेख गर्नुभयो ।
तालिममा नेरेसो मोरङका थमराज लिम्बू, खगेन्द्रप्रसाद घिमिरे, राजघाट स्वास्थ्य चौकीका इञ्चार्ज सन्दिप नेयोङ र डा. सेन्जिसा लामाले सहजीकरण गर्नुभएको थियो । नेपाल रेडक्रस सोसाइटी उपशाखा उर्लाबारीले समुदायलाई लक्षित गर्दै स्वास्थ्य सुरक्षा, विपद् व्यवस्थापन तथा सामाजिक सेवा सम्बन्धी कार्यक्रम निरन्तर सञ्चालन गर्दै आएको सभापति भानुभक्त शर्मा पराजुलीले बताउनुभयो ।
