उर्लाबारी, १२ मंसिर
नेपाल रेडक्रस सोसाइटी उपशाखा उर्लाबारीकाे आयोजनामा प्राथमिक उपचार सम्बन्धि तालिम सुरु भएको छ। समुदायमा आकस्मिक घटनाको व्यवस्थापन क्षमता अभिवृद्धि गर्ने उद्देश्यले उर्लाबारी नगरपालिकाकाे सभाहलमा आयोजित तालिममा उर्लाबारीका १३ विद्यालयबाट शिक्षक नायक र विद्यार्थी गरी ६५ जनाको सहभागिता रहेको छ।
तालिम उद्घाटन समारोह उपशाखा सभापति भानुभक्त शर्मा पराजुलीकाे अध्यक्षता र उर्लाबारी नगरपालिका उपप्रमुख मीना खतिवडा पौडेलकाे प्रमुख आतिथ्यतामा सम्पन्न भएको छ । कार्यक्रममा नगरपालिकाका प्रमुख प्रशासकीय अधिकृत अभयकुमार गुप्ता, रेडक्रस उर्लाबारीका संस्थापक सभापति तेजकुमार रिजाल, पूर्व सभापतिहरू केशव कार्की, जितबहादुर खत्री र मदनकुमार प्रसाईंको विशेष उपस्थिति थियो।
कार्यक्रमकाे औचित्यबारे जानकारी गराउँदै उपशाखा उपसचिव तथा कार्यक्रम संयोजक सचिन शाक्यले विद्यालयस्तरमा प्राथमिक उपचार सम्बन्धी सीप विकास हुनु आवश्यक रहेको बताउनुभयो। उहाँले विद्यालयमा हुने साना–ठूला दुर्घटना, चोटपटक, स्वास्थ्य आपतकालीन अवस्थालाई तालिमप्राप्त शिक्षक र विद्यार्थीले तत्काल व्यवस्थापन गर्न सक्ने भएकाले यस्तो तालिम अत्यन्तै उपयोगी भएको उल्लेख गर्नुभयो।
उद्घाटन सत्रमा प्रमुख अतिथि पौडेलले विद्यालयका विद्यार्थी र शिक्षकलाई लक्षित गरी आयोजना गरिएको तालिमले स्थानीय तहमा आपतकालीन स्वास्थ्य प्रतिक्रिया क्षमतामा बल पुग्ने विश्वास व्यक्त गर्नुभयो। उहाँले स्थानीय सरकार समुदाय तथा विद्यालयमै आधारित स्वास्थ्य सुरक्षा प्रवर्धनमा सदैव सहयोगी रहने प्रतिवद्धता जनाउनुभएको थियो। संस्थापक सभापति तेजकुमार रिजालले रेडक्रस उपशाखाले निरन्तर समुदायमूलक कार्यक्रम सञ्चालन गर्दै आएको उल्लेख गर्दै फस्ट एड सीप प्रत्येक व्यक्तिले सिक्नुपर्ने जीवनरक्षक ज्ञान भएको बताउनुभयो।
तालिममा नेरेसाे मोरङका थमराज लिम्बू प्रमुख प्रशिक्षकका रूपमा रहनुभएको छ। साथै राजघाट स्वास्थ्य चौकीका इञ्चार्ज सन्दिप नेयाेङ, नेरेसाे मोरङका खगेन्द्र प्रसाद घिमिरे, तथा गेष्ट प्रशिक्षकका रूपमा गोदावरी अस्पतालका अध्यक्ष डा. सूर्यनारायण साह र डा. सेन्जिसा लामाले समेत प्रशिक्षण प्रदान गर्दैछन् ।
नेपाल रेडक्रस सोसाइटी उपशाखा उर्लाबारीले समुदायलाई लक्षित गर्दै स्वास्थ्य सुरक्षा, विपद् व्यवस्थापन तथा सामाजिक सेवा सम्बन्धी कार्यक्रम निरन्तर सञ्चालन गर्दै आएको सभापति भानुभक्त शर्मा पराजुलीले बताउनुभयो । प्राथमिक उपचार तालिम पनि त्यहीँ श्रृंखलाको एक महत्वपूर्ण गतिविधि भएको उहाँको भनाइ छ।
