उर्लाबारी, १२ मंसिर
निजी तथा आवासीय विद्यालय अर्गनाइजेशन नेपाल (प्याव्सन) उर्लाबारी नगर समितिको आयोजनामा आजदेखि ‘प्याव्सन स्पोर्टस् मिट २०८२’ सुरु भएको छ । आज उर्लाबारी–६ स्थित राधिका माविको खेलमैदानमा एक कार्यक्रमका बीच प्रमुख अतिथि उर्लाबारी नगरपालिकाकी उपप्रमुख मीना खतिवडा पौडेलले प्याव्सन खेलकुद मेलाको उद्घाटन गर्नुभयो ।
तीन दिनसम्म चल्ने प्रतियोगितामा छात्रछात्रा भलिबल, छात्र फुटबल, छात्र फुटसल र छात्र छात्राको अलगअलग टेबल टेनिस खेल सुरु भएको अध्यक्ष सूर्य पौडेलले जानकारी दिनुभयो । आज कक्षा ५ सम्मका छात्रहरुको फुटसलको फाइनल सम्पन्न भएको छ । १६ वटा विद्यालयले सहभागिता जनाएको फुटसलमा ब्रिलियन्ट इङ्लिस बोर्डिङ स्कुल उर्लाबारी–२ प्रथम भएको छ । यस्तै, पशुपति आमावि उर्लाबारी–७ दोस्रो र सप्तकोशी आमावि उर्लाबारी–४ तेस्रो भएको उक्त खेलका कोअर्डिनेटर तारा सुब्बाले जानकारी दिनुभयो ।
प्रतियोगिता अन्तर्गत छात्राको भलिबल, एकल तथा डबल टेबलटेनिस खेल सुनगाभा आमाविमा, छात्र फुटबल तथा भलिबल खेल राधिका माविको खेलमैदानमा भइरहेको प्याव्सन नगर सचिव एलपी राईले बताउनुभयो । प्रत्येक खेलमा प्रथम, दोस्रो र तेस्रो हुनेलाई ट्रफी, मेडल र प्रमाणपत्र प्रदान गरिने जनाइएको छ ।
