उर्लाबारी, ११ मंसिर
उर्लाबारी नगरपालिकाले “म तिर्छु कर, बनाउँछु उर्लाबारी नगर” भन्ने नारासहित राजश्व अभिवृद्धि तथा बजार अनुगमन अभियान सुरु गरेको छ। बिहिबार नगरपालिकामा सरोकारवालासँग आयोजित संयुक्त कार्यक्रममार्फत सो अभियानको घोषणा गरिएको हो ।
कार्यक्रममा नगरप्रमुख गंगाप्रसाद खरेल, उपप्रमुख मिना खतिवडा पौडेल, प्रमुख प्रशासकीय अधिकृत अभयकुमार गुप्ता लगायतले अभियानको उद्देश्य, कर प्रणाली सुधारका पहलहरू तथा खाद्य सुरक्षासम्बन्धी योजनाबारे विस्तृत जानकारी दिएका थिए । अभियानअन्तर्गत नगरपालिका हालै समावेश गरिएको अनलाइन कर भुक्तानी प्रणालीलाई प्रभावकारी रूपमा नागरिकसम्म पुर्याउने, करका प्रकार, प्रक्रिया र आवश्यक कागजी कार्यबारे जानकारी दिने तथा नागरिकलाई कर तिर्न अभिप्रेरित गरिनेछ। टोल–टोलमा पुगेर खाद्य सुरक्षा सम्बन्धी जानकारीसमेत प्रवाह गरिने जनाइएको छ।
यसैबिच, नगरपालिकाले अब विश्वको जुनसुकै स्थानबाट अनलाइनमार्फत कर तिर्न मिल्ने सुविधा समेत सार्वजनिक गरेको छ। अभिमुखिकरण कार्यक्रममा आलेप अधिकृत कुबेर ढकालले विदेशमा रहेका उर्लाबारीवासीले समेत आफ्नै मोबाइल वा कम्प्युटरबाट कर तिर्न सक्ने व्यवस्था सुरु भएको जानकारी दिए।
प्रमुख प्रशासकीय अधिकृत गुप्ताका अनुसार, चालु आर्थिक वर्षमा १७ करोड रुपैयाँ आन्तरिक आम्दानी संकलन गर्ने लक्ष्य राखिएको छ। कर प्रणालीलाई व्यवस्थित, पारदर्शी र सेवा–उन्मुख बनाउन २७ दिने अभिमुखिकरण अभियान प्रभावकारी माध्यम हुने विश्वास लिइएको छ।
अभियानको सुरुवात कार्यक्रममा वडा–६ का अध्यक्ष चिन्तामणी पौडेल, विभिन्न वडाका वडा सदस्यहरु, कर्मचारीहरुसहित सरोकारवाला, संस्थागत प्रतिनिधि र संचारकर्मीको उल्लेख्य उपस्थिति रहेको थियो ।
