उर्लाबारी, ११ मंसिर
निजी तथा आवासीय विद्यालय अर्गनाइजेशन नेपाल (प्याव्सन) उर्लाबारी नगर समितिको आयोजनामा भोलिदेखि ‘प्याव्सन स्पोर्टस् मिट २०८२’ हुने भएको छ । प्याव्सन उर्लाबारीमा आवद्ध २५ विद्यालयको सहभागितामा हुने खेलकुद मेलाको उद्घाटन राधिका माविको खेलमैदानमा भव्यताका साथ हुने आज पत्रकार सम्मेलन गरी जानकारी दिइएको छ ।
तीन दिनसम्म चल्ने प्रतियोगितामा छात्रछात्रा भलिबल, छात्र फुटबल, छात्र फुटसल र छात्र छात्राको अलगअलग टेबल टेनिस खेल हुने अध्यक्ष सूर्य पौडेलले जानकारी दिनुभयो । निजी तथा आवासीय विद्यालयमा अध्ययनरत विद्यार्थीहरूको सर्वाङ्गीण विकासलाई लक्षित गर्दै विभिन्न प्रतिस्पर्धात्मक खेल आयोजना गरिएको उहाँले बताउनुभयो ।
‘स्वास्थ्यका लागि खेलकुद, राष्ट्रका लागि खेलकुद’ भन्ने मूल नारासहित विद्यालय तहबाटै खेलकुदमा अभिप्रेरित गर्दै राष्ट्रिय तथा अन्तर्राष्ट्रिय स्तरका खेलाडी उत्पादनमा टेवा पुग्ने अपेक्षाका साथ प्रतियोगिता आयोजना गरिएको नगर सचिव एलपी राईले जानकारी दिनिुभयो । प्रतियोगिता अन्तर्गत छात्र छात्राको भलिबल, एकल तथा डबल टेबलटेनिस खेल सुनगाभा आमाविमा, छात्र फुटबल खेल राधिका माविको खेलमैदानमा र कक्षा ५ सम्मका विद्यार्थीहरुको फुटसल खेल उर्लाबारी फुटसलमा सञ्चालन हुने कार्यक्रम संयोजक आनन्द कार्कीले बताउनुभयो । प्रत्येक खेलमा प्रथम, दोस्रो र तेस्रो हुनेलाई ट्रफी, मेडल र प्रमाणपत्र प्रदान गरिने उहाँले बताउनुभयो ।
प्रतियोगिता सञ्चालनका लागि ६ लाख ७० हजार ६० रुपैयाँ खर्च हुने अनुमान गरिएको छ । प्रदेश शुल्कबाट १ लाख ४५ हजार तथा प्याव्सन नगर समितिको आन्तरिक संस्थागत कोषबाट ५ लाख २५ हजार ६० रुपैयाँ खर्च गरिने समितिले जनाएको छ । पत्रकार सम्मेलनमा प्याव्सनका पूर्व केन्द्रीय सदस्य लेखनाथ भट्टराई, प्रदेश सदस्य दिनेश पोख्रेल, निजी विद्यालय सञ्चालक तथा प्रिन्सिपलहरु कुवेर न्यौपाने, जीवन बस्नेत, इन्द्र लिम्बू, तारा सुब्बालगायतको उपस्थिति रहेको थियो ।
