उर्लाबारी, ७ मंसिर
निजी तथा आवासीय विद्यालय अर्गनाइजेशन नेपाल (प्याव्सन) उर्लाबारी नगर समितिको आयोजनामा लोक नृत्य प्रतियोगिता सम्पन्न भएको छ । आज उर्लाबारी–७ स्थित उर्लाबारी पार्टी प्यालेसमा भएको प्रतियोगितामा सिनियरतर्फ उर्लाबारी–७ को भृकुटी मोडल एकाडेमी र जुनियरतर्फ उर्लाबारी–२ को ब्रिलियन्ट इङ्लिस बोर्डिङ स्कुल प्रथम भएका छन् ।
सिनियरतर्फ ८ विद्यालयले सहभागिता जनाएकोमा उर्लाबारी–७ को नेपाल आदर्श अंग्रेजी माध्यमिक विद्यालय दोस्रो र उर्लाबारी–३ स्थित सनसाइन बोर्डिङ स्कुल तेस्रो भए । यस्तै, जुनियरतर्फ सहभागी १९ विद्यालयमध्ये उर्लाबारी–६ स्थित कुडोस विद्यासदन दोस्रो र उर्लाबारी–५ स्थित सुनगाभा आमावि तेस्रो भए । प्रथम, दोस्रो र तेस्रो हुने विद्यालयलाई प्याव्सन कोशी प्रदेश सहसचिव भुवन श्रेष्ठ, प्रदेश सदस्य दिनेश पोख्रेल, मोरङ जिल्ला सल्लाहकार सुरेन्द्र सुवेदी, प्याव्सन नगर अध्यक्ष सूर्यकुमार पौडेल, सञ्चार क्लब नेपालका अध्यक्ष कुमार खड्का, समाजसेवी जयधर्म आचार्यलगायतले पुरस्कार प्रदान गर्नुभयो ।
आजको नगरस्तरीय प्रतियोगितामा उत्कृष्ट सिनियरतर्फ भृकुटी मोडल एकाडेमी र नेपाल आदर्श स्कुल तथा जुनियरतर्फ ब्रिलियन्ट, कुडोस, सुनगाभासहित नेपाल आदर्श र शुभकामना बोर्डिङ स्कुलले जिल्लास्तरीय प्रतियोगितामा भाग लिने अध्यक्ष पौडेलले बताउनुभयो ।
उर्लाबारी नगरपालिका शिक्षा शाखा प्रमुख उपसचिव शालिग्राम काफ्लेको प्रमुख आतिथ्यतामा भएको कार्यक्रममा उर्लाबारी–२ का वडाध्यक्ष राजन कँडेल, वडा नं. ६ का वडाध्यक्ष चिन्तामणि पौड्याल, उर्लाबारी उद्योग वाणिज्य संघका अध्यक्ष तारामान सेरेङ लिम्बू, प्याव्सनका पूर्व केन्द्रीय सदस्य लेखनाथ भट्टराई, आदिवासी जनजाति महासंघ नगर समन्वय परिषद उर्लाबारीका अध्यक्ष प्रेम याख्खालगायतको आतिथ्यता रहेको थियो ।
