ताप्लेजुङ, ५ मंसिर
मैवाखोला गाउँपालिका सामुदायिक विद्यालयहरूको शैक्षिक गुणस्तर सुधारका लागि निरन्तर प्रयासरत छ । यही उद्देश्यसहित गाउँपालिकाले काठमाडौं विश्वविद्यालय स्कुल अफ एजुकेसनसहितसँग सहकार्य गर्दै सबै शिक्षकका लागि तहगत पाठ्यक्रममा आधारित विषयगत तालिम सुरु गरेको छ । आज एक कार्यक्रमका बीच तालिमको उद्घाटन गरिएको छ ।
तालिममा पालिकाका विद्यालयका सबै शिक्षक सहभागी छन् भने उनीहरूलाई तहअनुसार फरक–फरक समूहमा विभाजन गरी व्यावसायिक क्षमता विकास सम्बन्धी सहजीकरण गरिएको छ । तालिममा काठमाडौं विश्वविद्यालय स्कुल अफ एजुकेशनका एसोसिएट डिन÷एसोसिएट प्रोफेसर डा. शिषकान्त पंगेनी, इपिसिइ कोअर्डिनेटर तथा लेक्चरर सन्दीप ढुङ्गाना, साथै अनुभवी फ्याकल्टी सदस्यहरू इन्द्रमणी दाहाल, राजेन्द्र दाहाल, ढुन्डिराज गिरी, मनिषा हाडा र मिरा शर्माले सहजीकरण गरिरहनुभएको छ ।

गाउँपालिका अध्यक्ष विजयप्रकाश वनेमका अनुसार यो तालिम सबै शिक्षकका लागि अत्यन्त उपयोगी हुनेछ भन्ने विश्वास लिइएको छ । “अब हाम्रा शिक्षकहरूले ‘तालिम पाएका छैनौं’ भन्ने गुनासो गर्ने अवस्था रहने छैन । महत्वपूर्ण कुरा तालिमलाई इमानदारीपूर्वक कक्षामा लागू गर्नु हो,” उहाँले भन्नुभयो ।

उहाँका अनुसार शिक्षामा रूपान्तरण ल्याउने अभियानको आधार गाउँपालिकाको राजनीतिक प्रतिबद्धता, संवैधानिक दायित्व, आबधिक विकास योजना, शिक्षा सुधारका लागि ४२ बुँदे घोषणा पत्र, १० वर्षे रणनीतिक योजना तथा विद्यार्थी र नागरिकहरूको सुझाव नै रहेको अध्यक्ष वनेमले बताउनुभयो । उहाँले शिक्षा क्षेत्रमा गरिएको लगानीको तात्कालिक परिणाम नदेखिए पनि दीर्घकालमा यसको प्रभाव गहिरो हुने उल्लेख गर्नुभयो ।