उर्लाबारी, १३ असार
उर्लाबारी–७ स्थित नेपाल आदर्श अंग्रेजी माध्यमिक विद्यालयले यसै शैक्षिक सत्रदेखि कक्षा ११ मा होटल म्यानेजमेन्ट विषयको पठनपाठन सुरु गर्ने भएको छ । विद्यालयले आज पत्रकार सम्मेलनको आयोजना गर्दै आफ्नो शैक्षिक विस्तारसँगै गुणस्तर र सीपमूलक शिक्षामा केन्द्रित हुने योजना सार्वजनिक गरेको हो ।
स्थापना भएको छोटो समयमै विद्यार्थी र अभिभावकको मन जित्न सफल नेपाल आदर्शले नयाँ विषय थप गर्दै अघि बढेको प्रिन्सिपल सविना खड्काले बताउनुभयो । नेपाल दर्शन कलेज र नेपाल आदर्श विद्यालय एउटै संस्थागत व्यवस्थापनअन्तर्गत सञ्चालनमा छन् । नेपाल दर्शन कलेज उर्लाबारीकै पुरानो र स्थापित शैक्षिक संस्था हो, जसले विगतदेखि नै कक्षा ११ र १२ मा विज्ञान तथा व्यवस्थापन संकायअन्तर्गत शैक्षिक सेवा प्रदान गर्दै आएको छ । अब यही व्यवस्थापनले नेपाल आदर्श विद्यालयमा पनि होटल म्यानेजमेन्ट जस्ता सीपमूलक विषय सुरु गर्न लागेको हो ।
“विद्यार्थीले अब माध्यमिक तहदेखि नै रोजगारीको सम्भावना रहने व्यावसायिक विषय अध्ययन गर्न पाउने छन्,” प्रिन्सिपल खड्काले भन्नुभयो, “हामीले उद्योग र बजारको मागअनुसार विषय छनोट गरेका छौं ।”
विद्यालयले शैक्षिक कार्यक्रमसँगै अतिरिक्त क्रियाकलापलाई पनि बराबरी महत्व दिएको जनाएको छ । गायन, नृत्य, चित्रकला, भलिबल, क्रिकेट लगायतका क्षेत्रका लागि अनुभवी प्रशिक्षकको व्यवस्था गरिएको नेपाल दर्शन कलेजका भाइस प्रिन्सिपल दुर्गाप्रसाद पौडेलले बताउनुभयो । “हाम्रो लक्ष्य विद्यार्थीको समग्र विकास हो,” पौडेलले भन्नुभयो, “पढाइ मात्र नभएर कला, खेलकुद र सिर्जनशीलतालाई पनि समान प्राथमिकता दिइएको छ ।”

विद्यालयमा अत्याधुनिक प्रयोगशाला, कम्प्युटर कक्षा र डिजिटल शिक्षण उपकरणहरूको प्रयोग हुँदै आएको छ । विज्ञान संकायका लागि विशेष सुविधा सम्पन्न प्रयोगशाला स्थापना गरिएको छ भने कम्प्युटर शिक्षामा व्यवहारिकतालाई प्राथमिकता दिइएको छ । प्रत्येक कक्षाकोठामा स्मार्ट बोर्डको व्यवस्था गरिएको छ । विद्यालयमा गुणस्तरीय शिक्षण, विद्यार्थी–शिक्षक सम्बन्ध र अभिभावकको विश्वासलाई निरन्तर मजबुत बनाउने लक्ष्य लिइएको प्रिन्सिपल खड्काले बताउनुभयो । नेपाल दर्शन कलेज र नेपाल आदर्शले संयुक्त रूपमा स्थानीय क्षेत्रमा गुणस्तरीय, आधुनिक र रोजगारीमुखी शिक्षाको विकल्प प्रस्तुत गर्ने उहाँले बताउनुभयो । विद्यालयका कोअर्डिनेटर गोविन्द भट्टराईले विद्यार्थीको विशेष रेखदेखमा शैक्षिक क्रियाकलाप सञ्चालन गरिँदै आएको बताउनुभयो ।