उर्लाबारी, ३० साउन
उर्लाबारी बहुमुखी क्याम्पस सञ्चालक समिति चयनको पूर्वसन्ध्यामा गत जेठ ३० गते निर्वाचन समितिले एकाएक निर्वाचन कार्यक्रम स्थगन गरेको सूचना प्रकाशन ग¥यो । निर्वाचिन समिति संयोजक हस्तबहादुर भट्टराईले हस्ताक्षर गर्नुभएको सूचनामा ‘जेठ ३१ गतेका लागि तोकिएको मतदान प्रक्रियाका सम्पूर्ण कार्यक्रम विशेष कारणले तोकिएको समयमा सम्पन्न हुन नसक्ने भएकाले उक्त कार्यक्रम आगामी २०८२ भदौ ७ गते शनिबारभित्र सम्पन्न गर्ने गरी हाललाई स्थगित गरिएको छ’ भन्ने व्यहोरा उल्लेख थियो ।
जेठ ३१ गतेको निर्वाचन स्थगत गर्नुपर्ने विशेष कारण केही थिएन, थियो त राजनीतिक सहमतिको प्रयास । विगतदेखि नै राजनीतिक भागबण्डामा सञ्चालक समिति चयन हुँदै आएको उर्लाबारी बहुमुखी क्याम्पसमा यस वर्ष भने भागबण्डा पेचिलो बनेको छ ।
निर्वाचन समितिले पुनः तोकेको निर्वाचनको मिति आउन अब ८ दिन बाँकी छ । तर, अहिलेसम्म निर्वाचनका कुनै कार्यक्रम सार्वजनिक गरिएको छैन । यसबीचमा राजनीतिक दलहरु भने पटक पटक छलफलमा बसेका छन् । उर्लाबारीमा क्रियाशील राजनीतिक दलहरुले भागवण्डा गरेर सहमतिमा समिति चयन गर्ने प्रयास गरेपनि सफल हुन सकेका छैनन् । राजनीतिक दलको छलफलमा राष्ट्रिय स्वतन्त्र पार्टीले भने सहभागिता जनाएको छैन ।
क्याम्पस सञ्चालक समितिमा १५ सदस्यका लागि हुने निर्वाचनमा ४० जनाले उम्मेद्वारी दिएका छन् । नगरमा क्रियाशील नेपाली काँग्रेस, नेकपा एमाले, नेकपा माओवादी केन्द्र, नेकपा एस, राप्रपालगायत पार्टीबीच अहिलेसम्म भागबण्डामा सहमति हुन नसक्दा मतदानबाटै समिति चयन हुने देखिएको छ । राजनीतिक पार्टीहरु आ–आफ्नो अडानबाट पछि नहट्ने साथै पार्टीभित्रै पनि समस्या भएपछि सहमति हुन नसकेको स्रोतले जनाएको छ । क्याम्पस सभा सदस्यहरु भने निर्वाचनलाई अनिर्णयको बन्दी बनाउनुभन्दा निर्वाचनबाटै भएपनि समिति चयन गर्नुपर्ने बताउँदै आएका छन् । निर्वाचनका लागि ९१२ जनाको मतदाता नामावली सार्वजनिक गरिएको छ ।
क्याम्पस प्रमुख खेमराज कार्कीले भदौ ७ गते निर्वाचन हुने बताउनुभयो । ‘सहमति भए पनि नभएपनि भदौ ७ गते निर्वाचन हुन्छ’ उहाँले भन्नुभयो, ‘आइतबारदेखि निर्वाचन समितिले काम थाल्छ ।’