तिलक नेपाली, उर्लाबारी
आर्थिक रूपमा कमजोर वर्गको उत्थान तथा वित्तीय पहुँच सुनिश्चित गर्न सक्रिय सहारा नेपाल बचत तथा ऋण सहकारी संस्था लिमिटेडले विगतदेखि नै सामाजिक उत्तरदायित्वका कार्यक्रमहरूलाई प्राथमिकता दिँदै आएको छ । मुख्य कार्यालय बिर्तामोड, झापामा रहेको यस संस्थाले हाल मंगलबारे सेवा केन्द्रमार्फत मोरङ जिल्लाको उर्लाबारी र मिक्लाजुङ क्षेत्रमा सेवा दिदै आएको छ।
वि.सं. २०५२ सालमा स्थापना भएको सहारा नेपालले आफ्ना शेयर सदस्यहरूलाई समूह जमानी तथा धितोमा निश्चित ब्याजदरमा ऋण उपलब्ध गराउँदै आएको छ । तर यस संस्थाको विशेषता केवल ऋण–सहयोगमा सीमित छैन । यसले जीवन बीमा, पशु बीमा, वित्तीय साक्षरता अभियान, मृत्यु राहत कोष, सुत्केरी भत्ता, अपरेशन तथा दुर्घटना खर्च, सर्पदंश उपचार र प्राकृतिक विपत्तिमा आर्थिक सहयोग जस्ता कार्यक्रमहरू सञ्चालन गर्दै आएको छ ।
यसैक्रममा, उर्लाबारी–४ बक्राहाबाँधमा एक महिला सदस्यको श्रीमानको निधनपश्चात् सहकारीले रु ४ लाख ४० हजार रुपैयाँ सहयोग गरेको छ । समूह नं. ५५ को जुनेली सहारा महिला समूहकी सदस्य चन्द्रकला झागरका श्रीमान् हरि झागरको निधन भएपछि उक्त सहयोग गरिएको हो । आज एक कार्यक्रमबीच उर्लाबारी–४ का वडाध्यक्ष कल्याणकुमार राईले चेक हस्तान्तरण गरे ।
सो अवसरमा वडा अध्यक्ष राईले सहारा नेपालले विपत्का समयमा सदस्यहरूलाई साँचो अर्थमा “सहारा” दिएको भन्दै यसको प्रयासलाई प्रसंसा गरे । “सहकारी भनेको सहकार्य र आपसी सहयोग हो, सहाराले त्यसको राम्रो अभ्यास गरिरहेको छ,” वडाध्यक्ष राईले भने । कार्यक्रमको उद्देश्य माथि प्रकाश पार्दै मंगलबारे सेवा केन्द्रका प्रमुख त्रिलोचन तिम्सिनाले सहकारीले सामाजिक पक्षलाई समेट्दै आर्थिक सशक्तिकरणका लागि समेत बिभिन्न कार्यक्रम सञ्चालन गरिरहेको जानकारी दिए ।
सहारा नेपालले बचत गर्ने बानी विकास गर्नदेखि लिएर वित्तीय शैक्षिक कार्यक्रमसम्म विस्तार गरेको छ, जसले ग्रामीण तथा विपन्न वर्गमा आर्थिक चेतना र आत्मनिर्भरताको भावना विकासमा टेवा पुगेको छ । स्थानीय तह, समूह सदस्य, कर्मचारी तथा सरोकारवाला निकायसँग सहकार्य गर्दै सहारा नेपालले आगामी दिनमा अझ विस्तारित, समावेशी र सेवामूलक सहकारीको रूपमा आफूलाई प्रस्तुत गर्ने विश्वास लिएको तिम्सिनाले बताए । जुनेली सहारा महिला समूहका अध्यक्ष शान्ति नेपालीको अध्यक्षतामा भएको कार्यक्रम मंगलबारे सेवा केन्द्रका प्रतिनिधि प्रकाश श्रेष्ठले सञ्चालन गरेका थिए । कार्यक्रममा वडा सदस्य शेखरनाथ दाहाल, स्थानीय अगुवा, सहकारीका कर्मचारी, समूहमा आवद्ध महिलाहरुको उपस्थिति रहेको थियो ।