उर्लाबारी, २१ असार
यस क्षेत्रकै नमुना माध्यमिक विद्यालय उर्लाबारी–६ स्थित राधिका माविले माध्यमिक शिक्षा परीक्षा (एसईई) मा उत्तीर्ण हुने विद्यार्थीहरूलाई विशेष सम्मान गरेको छ । आज विद्यालयमा एक कार्यक्रमको आयोजना गरी एसईईमा उत्तीर्ण हुने सम्पूर्ण विद्यार्थीलाई सम्मान गर्नुका साथै जिपिए ३.६ भन्दा माथि ल्याउने ३८ जना मेधावी विद्यार्थीलाई जनही पाँच हजार रुपैयाँ नगदसहित सम्मान प्रदान गरेको छ । यो सम्मानका लागि विद्यालयले जम्मा एक लाख ९० हजार रुपैयाँ खर्च गरेको छ ।
विद्यालयबाट साधारण तथा प्राविधिक धार गरी ३ सय १० जना विद्यार्थीले एसईई परीक्षा दिएका थिए, जसमा २५४ जना विद्यार्थी उत्तीर्ण भएका छन् । राधिकाका दुई विद्यार्थी रुवेश न्यौपाने र सुसान्त चम्लागाईंले ३.९६ जिपिए प्राप्त गर्दै उर्लाबारी प्रथम बनेका छन् ।
सम्मान कार्यक्रमका प्रमुख अतिथि उर्लाबारी नगरपालिका शिक्षा शाखाका प्रमुख तथा उपसचिव शालिग्राम काफ्लेले सामुदायिक विद्यालयहरूले समेत प्राविधिक शिक्षासहितको गुणस्तरीय शिक्षा दिन थालेको उल्लेख गर्दै राधिका माविको प्रशंसा गर्नुभयो । “शिक्षामा सुधारका लागि यस्ता प्रोत्साहन कार्यक्रमहरू आवश्यक छन्,” उहाँले भन्नुभयो, “राधिकाले जस्तो उदाहरणीय कार्य अन्य विद्यालयहरूले पनि अनुकरण गर्नु जरुरी छ ।”
सो अवसरमा विद्यालयका प्रधानाध्यापक कुमार पोख्रेलले राधिका माविले गुणस्तरीय शिक्षामा जोड दिँदै आएको बताउनुभयो । विद्यार्थीहरुको हौसला र उत्साह बढाउन सम्मान कार्यक्रम राखिएको उहाँले बताउनुभयो ।
कार्यक्रमको अध्यक्षता गर्नुभएका विद्यालय व्यवस्थापन समिति अध्यक्ष लोलिम पोमू लिम्बूले विद्यालयको प्रगतिका लागि सबैको सहकार्य आवश्यक रहेको बताउँदै राधिका माविलाई उत्कृष्ट बनाउन लागि परेको बताउनुभयो । उहाँले एसईई उत्तीर्ण विद्यार्थीलाई थप शैक्षिक सफलताको शुभकामना व्यक्त गर्नुभयो ।
राधिका मावि यस क्षेत्रकै उत्कृष्ट सामुदायिक विद्यालयको रूपमा परिचित छ । नियमित शैक्षिक अनुगमन, दक्ष जनशक्ति, सूचना प्रविधिको उपयोग, प्राविधिक शिक्षा, विभिन्न अतिरिक्त क्रियाकलाप सञ्चालन गर्दै आएको विद्यालयमा दुई हजारभन्दा बढी विद्यार्थी अध्ययनरत छन् ।