उर्लाबारी, २४ जेठ
मोरङको रतुवामाई नगरपालिकाको आयोजनामा तथा नोबेल मेडिकल कलेज, विराटनगरको प्राविधिक सहयोगमा सञ्चालन गरिएको तीनदिने निःशुल्क वृहत स्वास्थ्य शिविर सफलतापूर्वक सम्पन्न भएको छ । नगरवासीको स्वास्थ्य सुरक्षालाई प्राथमिकतामा राख्दै आयोजना गरिएको यस शिविरले उल्लेखनीय सफलता प्राप्त गरेको छ ।
शिविरको पहिलो दिन रतुवामाई नगर अस्पताल, झुर्कियामा शिविर सम्पन्न भयो भने दोस्रो दिन सौंठा बहुमुखी क्याम्पस परिसरमा र तेस्रो दिन सर्वेश्वर शिवालय मन्दिर, भौडाहामा सेवा प्रदान गरियो । यसरी फरक–फरक स्थानमा शिविर सञ्चालन गरिनुले विभिन्न टोल–टोलका नागरिकलाई सेवा लिन सहज भएको थियो ।
स्वास्थ्य शिविरमा मेडिसिन, सर्जरी, प्रसूति तथा स्त्रीरोग, बालरोग, नेत्ररोग, हाडजोर्नी, नाक–कान–घाँटी, मुटुको जाँच (इसीजी), प्रयोगशाला (रगत तथा पिसाब परीक्षण), रेडियो डायग्नोसिस तथा दन्त चिकित्सा लगायतका सेवा उपलब्ध गराइएको थियो ।
तीन दिनसम्म सञ्चालन भएको उक्त शिविरबाट कुल १४०३ जना नागरिकले सेवा लिएका छन् । विभिन्न उमेर समूहका व्यक्तिहरूले शिविरमा उपस्थित भई स्वास्थ्य परीक्षण गराएका थिए । परीक्षणको क्रममा जटिल अवस्थाका बिरामीहरूको उपचार नोबेल अस्पताल, विराटनगरमा ५० प्रतिशत छुटमा र काठमाडौँ मेडिकल कलेज, काठमाडौंमा पूर्णरूपमा निःशुल्क गरिने व्यवस्था गरिएको नगर प्रमुख नागेश्वरप्रसाद सिंह गनगाईँले बताउनुभयो ।
उहाँले यस्तो शिविरले सर्वसाधारणको स्वास्थ्यमा सकारात्मक प्रभाव पार्ने विश्वास व्यक्त गर्दै भन्नुभयो, “हामी नगरवासीको स्वास्थ्यप्रति संवेदनशील छौं। यस्ता शिविरहरूलाई निरन्तरता दिने हाम्रो प्रतिबद्धता छ । सबै नागरिकसम्म गुणस्तरीय स्वास्थ्य सेवा पु¥याउनु नै हाम्रो लक्ष्य हो ।’ यस किसिमको शिविरले ग्रामीण भेगमा रहेका तथा नियमित स्वास्थ्य परीक्षणबाट वञ्चित नागरिकलाई राहत दिने विश्वास व्यक्त गरिएको छ । रतुवामाई नगरपालिकाले आगामी दिनमा पनि यस्ता जनमैत्री कार्यक्रमलाई निरन्तरता दिने जनाएको छ ।
