उर्लाबारी, २० भदौ
उर्लाबारी भएर बग्ने खोलाहरुमा प्रारम्भिक वातावरणीय परीक्षण (आईइइं) अध्ययनको सिलसिलामा सोमबार नगरपालिकाका मेयर गंगाप्रसाद खरेल नेतृत्वको टोलीले अनुगमन तथा निरीक्षण गरेको छ । नदिजन्य पदार्थ (ढुंगा, गिटी, बालुवा आदि) संकलन तथा बिक्री शुल्क असुल गर्ने प्रयोजनका लागि स्थलगत अनुगमन गरिएको हो ।
नगरपालिकाका प्रमुख प्रशाकीय अधिकृत अग्निप्रसाद अधिकारी, वडाध्यक्ष राजन कँडेल, सेक्टर वन मंगलबारेका रेञ्जर अमृत चेम्जोङ, नगरपालिकाका इन्जिनियर र प्राविधिकससिहतको टोलीले स्थानीय सोल्टी, सुनझोडा, बाहुनी र तेली खोलाको नदिजन्य पदार्थ, खोलाको उकास भाग आदिको नापजाँच र मापन गरेको हो ।
जथाभावी हुने खोलाको उत्खनन्लाई रोक्न प्रतिवेदनले व्यवस्था गरे अनुसार र नदीजन्य सामाग्री ठेक्का सम्झौता भएका स्थानमा मात्र उत्खनन् हुनुपर्ने तयारीस्वरुप खोला अनुगमन गरिएको मेयर खरेलको भनाई छ । अनुगमनका क्रममा आईइइले ठहर नगरेको स्थानमा समेत नदीजन्य सामग्री उत्खनन भएको पाइएको छ । ‘विधि र प्रक्रियालाई अटेरी गर्दै मनोमानी ढंगबाट नदीजन्य सामग्री जथाभावी उत्खनन् गरेको पाइयो’ मेयर खरेलले भने – ‘त्यस्ता गैरकानूनी काम गर्नेहरुका विरुद्ध कडा कदम चालिने छ ।’
