About us    Advertise    Nepali Unicode    Preeti to Unicode               

काठमाडौं, ८ भदौ । कोरोना भाइरस संक्रमणको जोखिम रोकथाम तथा नियन्त्रणका लागि विभिन्न तहका सरकारहरुले संघीय राजधानी काठमाडौं तथा ललितपुर र भक्तपुरसहित देशभरका ४७ वटा जिल्लामा निषेधाज्ञा जारी गरेको छ ।

सङ्क्रामक रोग ऐन, २०२० तथा स्थानीय प्रशासन ऐन, २०२८ ले दिएको अधिकार प्रयोग गरी काठमाडौँ उपत्यकाका ३ वटै जिल्लासहित हालसम्म ४७ जिल्लाका प्रमुख जिल्ला अधिकारीबाट निषेधाज्ञाको आदेश जारी भइ कार्यान्वयन भइरहेको गृह मन्त्रालयले जनाएको छ ।

मन्त्रालयका प्रवक्ता चक्रबहादुर बुढाले आइतबार एक प्रेस विज्ञप्ति जारी गरी दिएको जानकारी अनुसार कोभिड–१९ को सङ्क्रमण जोखिम कम गर्ने सम्बन्धमा भएका निर्णय र निर्देशन कार्यान्वयनको प्रभावकारिताका लागि ७७ वटै जिल्लामा जिल्ला प्रशासन कार्यालयको संयोजनमा संयुक्त अनुगमन टोली परिचालन गर्ने व्यवस्थासमेत मिलाइएको छ ।

उद्धार उडानबाट स्वदेश आउने व्यक्तिलाई काठमाडौं उपत्यकाका विभिन्न स्थानमा राख्ने क्वारेन्टिन निर्माण, सञ्चालन तथा व्यवस्थापनको प्रक्रियासमेत शुरु भएको मन्त्रालयले जानकारी दिएको छ ।

यस्तै मुलुकको दक्षिणी सीमामा तोकिएका प्रवेश विन्दुबाट आवागमनको अभिलेख राखी व्यवस्थापन गर्ने कार्य भइरहेको छ ।

साथै अत्यावश्यक सेवासँग सम्बन्धित पेशा र व्यवसाय सञ्चालन गर्दा मास्क लगाउने, न्यूनतम सामाजिक दूरीको पालना गर्ने र गराउनेजस्ता जनस्वास्थ्यका मापदण्ड, प्रोटोकल पालना भए नभएको सम्बन्धमा निरन्तर अनुगमन भइरहेको मन्त्रालयका प्रवक्ता बुढाद्धारा जारी विज्ञप्तिमा उल्लेख छ ।

प्रतिक्रिया

सम्बन्धित खवर

ताजा समाचार

लोकप्रिय