उर्लाबारी, २९ जेठ
केही वर्षयता झापाका सहकारी मोरङको उर्लाबारीलगायतका पालिकामा प्रवेश गर्ने क्रम चलिरहँदा मोरङबाट भने पहिलो पटक झापामा सहकारीको सेवा केन्द्र उद्घाटन भएको छ । उर्लाबारी–५ मा मुख्य कार्यालय रहेको सुदर्शन बचत तथा ऋण सहकारी संस्थाले आज दमकमा सेवा केन्द्र उद्घाटन गरेको हो ।
दमक–६ स्थित जेसीज चोकमा सञ्चालनमा आएको सेवा केन्द्र कार्यालयको बैदिक विधि अनुसार पूजापाठ गरी औपचारिक रुपमा शुरु गरिएको हो । कार्यालयको उद्घाटन संस्थाका अध्यक्ष गोपाल भट्टराई, लेखा समिति संयोजक राजु तिम्सिना, कार्यकारी प्रमुख थरेन्द्र पौडेललगायतले संयुक्त रुपमा गरेका थिए ।
१२ वर्षअघि उर्लाबारीमा युवा व्यवसायीहरुको सक्रियतामा स्थापना भएको संस्थाले यसअघि मोरङको मधुमल्ला र पथरी बजारमा सेवा केन्द्र सञ्चालनमा ल्याइसकेको छ । संस्थाका कार्यकारी प्रमुख पौडेलले सदस्यहरुको माग अनुसार सेवा प्रवाहमा सहजता ल्याउन प्रदेश १ का विभिन्न स्थानमा सेवा केन्द्र सञ्चालनमा ल्याउने योजना अनुरुप दमकमा सेवा केन्द्र सञ्चालनमा ल्याइएको बताए ।
१० हजार भन्दा बढी सदस्य संख्या रहेको सो संस्थाले एक वर्षअघि नै दमक क्षेत्रका सदस्यहरुसँग कारोबार शुरु गरेको भएपनि औपचारिक रुपमा भने आजबाट मात्रै सेवा केन्द्र सञ्चालनमा ल्याएको हो । संस्थाको दमक सेवा केन्द्र मातहतमा एक हजार भन्दा बढी सदस्य रहेका जनाइएको छ ।
संस्थाले नियमित बचत तथा ऋणको कारोबारलाई अघि बढाउँदै सुदर्शन शेयर सदस्य कल्याणकारी योजना ल्याइएको संस्थाका अध्यक्ष गोपाल भट्टराईले बताए । सो योजना अन्तर्गत शेयर सदस्यहरुका लागि सन्तान प्राप्ती खुशीयाली योजनामा एक हजार, प्राकृतिक प्रकोप राहत योजनामा २० हजार, शल्यक्रिया राहत योजनामा ७ हजार, अंगभंग राहत योजनामा २ लाख, अशक्त राहत योजनामा २५ हजार, स्वास्थ्य सुधार योजनामा एक लाख, छात्रवृत्ति योजनामा १० हजार र मृतक राहत योजनामा ४५ हजार सम्मको काजक्रिया खर्च प्रदान गर्ने स्किमहरु ल्याइएको विभागीय प्रमुख यादप भण्डारीले बताए ।
