काठमाडौं, १ पुस
नेकपा एमालेले प्रधानन्यायाधीश चोलेन्द्रशमशेर जबराविरुद्धको महाअभियोग प्रस्तावको प्रतिवाद गर्ने भएको छ । आइतबार बसेको एमाले सचिवालय बैठकले महाअभियोगलाई गम्भीर षड्यन्त्रपूर्ण र अदालतमाथिको प्रहार भन्दै प्रतिवाद गर्ने निर्णय गरेको हो ।
बैठकले सत्तारुढ गठबन्धनमा रहेका दलका सांसदले पेश गरेको महअभियोग प्रस्तावलाई लोकतन्त्र र सार्वभौमसत्तामाथिको प्रहार र स्थानीय तहको निर्वाचनलाई धकेल्ने षड्यन्त्र भएको निष्कर्ष निकालेको हो । बैठकपछि एमाले महासचिव शंकर पोखरेलले भने, ‘यो कदम नेपालमा सत्तापक्ष र प्रतिपक्षका बीचमा लामो समयपछि थालनी भएको संवादको प्रयासलाई विथोल्ने षड्यन्त्रका रुपमा आएको हामीले अनुमान गरेका छौं ।’ उनले यो कदम अनुचित भएको भन्दै त्यसलाई असफल पार्ने पनि बताए ।
